Big up yourself diyouth. Bless, Love young Lion. Always the I bring a smile to I face. I see what the I saying, yuh always bring great wisdom to yuh discussion. Yes I, mi love dat.

Dis whole gun and violence have affected I in ways that I don't have time and space to write about, yuh seeit. I sight all the ramifications regarding this crucial issue in our societies and I see from a perspective of the poor versus rich, seen. And de I done touch pon dem t'ings dey. But I'n'I have to look at solutions and seriously work at implementing them. We the elders have to be more welcoming of the yutes dem point of view. Give them a voice and listen to them keenly. Even if I'n'I disagree as we often do on this forum, yet we are not trying to find each other and shoot each other. I have made it my business to sit and reason with yutes who live this gun and violence experience. I a yaad ooman, who grew up in relative safety and security, was simply trying to overstand, the reasons. Growing in yaad, I got well schooled on this shituation and living in NY for almost ten years, was another learning tree in this cycle of gun and violence.

I'n'I sight sey still a one have to tek responsibility in the long or short run, seen but I'n'I still have to examine the dynamics of what allows this to itinously happen in societies where they have the capability to deploy thousands of troops to fight wars in far away lands yet they can't control gun trafficking in their own backyard. I'n'I was watching a program on WorldLink TV, last eve and dem was tawking 'bout the drug trafficking from places like colombia, peru and bolivia. But yow the eagle a spend billions of dollars fi and eradication program in these hot spots. The eradication program manage fi wipe out the local people dem crops, kill dem pickney leaving them broken and poorer than they were before. After all this de native dem end up haffe a plant coca, seen. Dem know sey it a go somewhey an' it a go harm some people but de eagle no lef dem no choice. So now some revolutionary haffe tek up arms especially inna colombia fi champion de poor people wey de war on drugs leave even poorer. A said way dem a fight it inna merrymakka, seen. A 80% percent a de drug addict dem on ya cyan get no kind a rehabilitation, yet de eagle spen' 30 billion or more in fifteen months a try eradicate coca plants in south america.

Yuh see diyouth, there is guns and violence but it is the drugs that fuels the need for a gun(protection) an' de violence always comes from a one trying to prove demself an' dem neva learn how fi reason out dem difference. Inna de ghetto an' inna larger society man an man naw respect one anedda, so dat is pure war. An is whole heap a odder side a dis gun, violence and drug t'ing. Like some domestic violence, again man a try prove himself because when him step out in society him no get no respect so him pent up anger reach him queen or yute dem. Man use gun fi keep dem ooman unda manners. So dat an' much more haffe go get check. An fi check dis cycle, we haffe go pay closer attention, to de education and nurturing of I'n'I yutes! De elders haffe go step up an' play dem part. Despite I'n'I disagreements, we can beg to agree that it is our duty to raise a generation of yutes that can claim our elders listened an respected us an guided us. Taught us how to be men and women, to be proud of who we are and like de old time Ras dem woulda sey, "yute yuh fi know yuhself". A no big time solution a go do it a simple t'ing, seen an it just not good enough to de yute dem no have no respect or manners and so therefore dem no have tawk. A cop out dat from yuh responsibility as an elder.

Hol' firm Rasta. Blessed Love.